ಇದುವರೆಗೆ ಸಂಸ್ಥೆಯಿಂದ ಸುಮಾರು 800ಕ್ಕೂ ಹೆಚ್ಚು ಮಂದಿ ಸಿದ್ಧಗೊಂಡಿದ್ದು ಯಾರೊಬ್ಬರೂ ದೀನಸ್ಥಿತಿಯಲ್ಲಿಲ್ಲದಿರುವುದು ಶ್ರೀಗಳವರ ಅನುಗ್ರಹ, ಶ್ರೀಭಂಡಾರಕೇರಿ, ಶ್ರೀಸುಬ್ರಹ್ಮಣ್ಯ ಮತ್ತು ಶ್ರೀಬಾಳಗಾರು ಮಠಾಧೀಶರು ವಿದ್ಯಾಪೀಠದಲ್ಲಿ ಅಧ್ಯಯನ ನಡೆಸಿದವರು ಎನ್ನಲು ಹೆಮ್ಮೆಯೆನಿಸುತ್ತದೆ. ಇದಲ್ಲದೆ ಶ್ರೀ ಸುವಿದ್ಯೆಂದ್ರತೀರ್ಥರು ಮತ್ತು ಶ್ರೀವಿಶ್ವಭೂಷಣ ತೀರ್ಥರೂ ವಿದ್ಯಾಪೀಠದಲ್ಲಿ ಸಿದ್ಧರಾದ ಯತಿಗಳು. ವಿ|| ಪ್ರಹ್ಲಾದಾಚಾರ್ಯರು ತಿರುಪತಿಯ ರಾಷ್ಟ್ರೀಯ ಸಂಸ್ಕೃತ ವಿದ್ಯಾಪೀಠದ ಕುಲಪತಿಗಳಾಗಿದ್ದರು. ಇದೀಗ ವ್ಯಾಸರಾಜಮಠದ ಪೀಠಾಧಿಪತಿಗಳಾಗಿದ್ದಾರೆ. ಇದಲ್ಲದೆ ವಿಶ್ವವಿದ್ಯಾಲಯಗಳಲ್ಲಿ ಅಧ್ಯಾಪಕರಾಗಿ ಕೆಲವರಿದ್ದಾರೆ. ಮತ್ತೆ ಕೆಲವರು ಶಾಲಾ ಕಾಲೇಜುಗಳಲ್ಲಿ, ಸಂಶೋಧನಾ ಸಂಸ್ಥೆಗಳಲ್ಲಿ ಸೇವೆ ಸಲ್ಲಿಸುತ್ತಿದ್ದಾರೆ. ತಾವಿದ್ದೆಡೆ ಜಿಜ್ಞಾಸುಗಳಿಗೆ ಪಾಠಪ್ರವಚನಗಳನ್ನು ಮಾಡಿ ಸಂಸ್ಥೆಯ ಉದ್ದೇಶವನ್ನು ಅನೇಕರು ಈಡೇರಿಸುತ್ತಿದ್ದಾರೆ.
ವಿದ್ಯಾಪೀಠದಲ್ಲಿ ಸಿದ್ಧರಾದ ವಿದ್ವಾಂಸರು ಸಮಗ್ರ ನ್ಯಾಯಸುಧಾಗ್ರಂಥವನ್ನು ಕನ್ನಡಕ್ಕೆ ತರ್ಜುಮೆಗೊಳಿಸಿದ್ದಾರೆ. ಸುಮಾರು 7,000 ಪುಟಗಳಲ್ಲಿ 7ಸಂಪುಟಗಳಲ್ಲಿ ಪ್ರಕಾಶನಗೊಂಡಿರುವ ಈ ಬೃಹದ್ಯೋಜನೆಯನ್ನು ಅಭಿಮಾನಿಗಳ ಸಹಕಾರದಿಂದ ವಿದ್ಯಾಪೀಠದ ವಿದ್ವಾಂಸರೊಬ್ಬರು ಸಾಕಾರ ಗೊಳಿಸಿದ್ದಾರೆ. ಇದಲ್ಲದೆ 9,000 ಪುಟಗಳಲ್ಲಿ 14 ಸಂಪುಟಗಳಾಗಿ ಶ್ರೀಮಧ್ವಾಚಾರ್ಯರ ಸರ್ವಮೂಲಗ್ರಂಥಗಳನ್ನು ಕನ್ನಡೀಕರಿಸಿದ್ದರೆ. ಈ ಸಂಪುಟಗಳನ್ನು ಅಖಿಲಮಾಧ್ವ ಮಹಾಮಂಡಳಿಯು ಪ್ರಕಾಶಿಸಿದೆ. ಇದಲ್ಲದೆ ಪ್ರಾಚೀನ ಹಸ್ತಪ್ರತಿಗಳನ್ನು ಶೋಧಿಸಿ ಶೇಷತಾತ್ಪರ್ಯಚಂದ್ರಿಕಾ, ವಿಜಯಧ್ವಜೀಯಾನುಸಾರಿ ಭಾಗವತ ಮುಂತಾದ ಪ್ರೌಢಗ್ರಂಥಗಳನ್ನು ವಿದ್ಯಾಪೀಠದ ವಿದ್ವಾಂಸರು ಪ್ರಕಾಶಪಡಿಸಿದ್ದಾರೆ.ಇಲ್ಲಿ ಸಿದ್ಧರಾದ ಅನೇಕ ಯಾಜ್ಞಿಕರು ಶಾಸ್ತ್ರೋಕ್ತವಾಗಿ ಹವ್ಯಕವ್ಯಗಳನ್ನು ನಡೆಸಿಕೊಡುತ್ತಾ ಸಮಾಜದ ಮೆಚ್ಚುಗೆ ಗಳಿಸಿದ್ದಾರೆ.